வல்லவனுக்கு புல்லும் ஆயுதம்

இன்று 'உலக பல்லுயிர் பெருக்க நாள் (22, May, World Biodiversity Day)' இந்த நாளில் அதெற்கென்று பொருத்தமான ஒரு நபரை பற்றி எழுத வேண்டும் என்று நினைத்தேன். அப்படி யோசித்தபோது இவரை பற்றி எழுதுவது தான் பொருத்தமாக இருக்கும் என்று Forest Man of India என்று அழைக்கப்படுபவரை பற்றி சில விஷயங்கள் தொகுத்துள்ளேன்.

'பாம்பென்றால் படை நடுங்கும்' என்பர். ஆனால் அப்படிப்பட்ட பாம்பினை பார்த்தால் முதல் வேளையாக  அதனை அடிப்பதற்கு கல்லையும் குச்சியினையும் தேடுவதாக இருக்கும் நபர்கள் அதிகம்.. ஆனால் பாம்புகள் இறந்ததினால் ஒரு பெரிய அடர் வனம் உருவானதினை நாம் கேள்விப்பட்டிருப்போமா? அதுவும் 1360 ஏக்கர் நிலப்பரப்பில்!

ஆம், அஸாம் மாநிலத்தில் ஜோர்ஹட் மாவட்டத்தில் உருவாக்கப்பட்டது. 

அதுவும் ஒரு தனி மனிதனால்!!? அவர் தான் , 'இந்திய வன மனிதர் (forest  man of India' என்று பெருமைப்படுத்தப்படும் 'mishing' பழங்குடி இனத்தை சார்ந்த பத்மஸ்ரீ ஜாதவ் பயேங்.

1978 ஆம் ஆண்டில் தனது 10 ஆம் வகுப்பினை அப்போதுதான் முடித்திருந்த ஜாதவ் தனது சொந்த ஊருக்கு திரும்பி கொண்டிருந்தார். அப்போது கண்ட காட்சி அவ்வளவு பெரிய வனத்தினை உருவாக்கும் என்று எதிர்பார்க்கவில்லை. பாம்புகள் உலர் நிலத்தில் இறந்து கிடந்தன. பக்கத்தில் உள்ள கிராம மக்களிடம் சென்று விசாரித்ததில் பிரம்மபுத்திரா நதியின் வெள்ளத்தில் அடித்துவரப்பட்டு இந்த வறண்ட நிலத்தில் தள்ளப்பட்ட பாம்புகள் அவை என்றும் மரங்கள் எதுவும் இல்லாததால் நிழலும் உணவும் கிடைக்கப் பெறாது இறந்து கிடக்கின்றன என்று தெரிவித்தனர். 

அதற்கான  மாற்றத்தை ஏற்படுத்த அவர் விரும்பியதனை கண்ட அவர்கள் 50 விதைகளையும் மூங்கில் நாற்றுகளையும் வழங்கினர்.அவற்றை அவர் விதைத்தும் 200 மூங்கில் கன்றுகளையும் நட்டு வளர்த்தார். ஆனால் அவைகள் மறுபடியும் வெள்ளத்தில் அடித்து செல்லப்பட்டது. ஆனாலும் மனம் தளராது அவர் விதைக்க ஆரம்பித்தார்.

அதனை தொடர்ந்து 1979 ஆம் ஆண்டு வனத்துறையால் Aruna Chapori  என்ற இடத்தில 200 ஹெக்டேர் நிலப்பரப்பில்  நடத்தப்பட்ட சமூக காடுகள் வளர்ப்பு திட்டத்தில் பணிபுரிந்தார். 5 ஆண்டுகளில் திட்டம் முடிந்தாலும், அத்திட்டத்தில் வளர்க்கப்பட்ட மரக்கன்றுகளை பார்த்துக்கொள்வதற்காக அங்கேயே தங்கி பணிபுரிய ஒப்புதல் பெற்றார். அவர் அங்கேயே தங்கி மரக்கன்றுகளை பாதுகாத்தல் மட்டும் செய்யவில்லை.  மரக்கன்றுகளையும் நட ஆரம்பித்தார். நட்டுக்கொண்டே இருந்தார். பின்னர் வனத்துறையும் இந்த  இடத்தினை மறந்து விட்டனர் . 2008 ஆம் வருடம் தற்செயலாக 115 யானைகள் இந்த காட்டு பகுதிக்குள் புகுந்து விட்டது. அதனை துரத்தி சென்ற வனத்துறையினர் காட்டை பார்த்து ஆச்சரியம் அடைந்துள்ளனர். அரசு பதிவேட்டில் இல்லாத இந்த காடு எப்படி உருவாகியிருக்கும் என்று விசாரித்து ஜாதவ்வை சந்தித்து அவரை பாராட்டி ஒத்துழைப்பு வழங்கி வருகின்றனர். 

ஜாதவுடன்  அவருடைய மனைவி மற்றும் மூன்று குழந்தைகளும் (2 மகன் மற்றும் 1 மகள்) இணைந்து அவருக்கு உதவி புரிகின்றனர்.

மூங்கிலில் துவக்கிய அவருடைய பயணம், படிப்படியாக புழு, பூச்சிகளை கொண்டு வந்து சேர்த்து, பறவைகளை தங்க வைத்தது, விலங்குகளை வரவழைத்தது. இறுதியாக வறண்டு வெள்ளை நிறமாக காட்சியளித்த மண் வளம் தரும் பழுப்பு நிறமாக மாறியது.

மூங்கில் என்பது புல் வகையை சார்ந்த தாவரமாகும். அப்படியென்றால் புல்லினை வைத்து பெரிய கானகத்தினை உருவாக்கிய இவருக்கு 

'வல்லவனுக்கு புல்லும் ஆயுதம்' என்ற பதம் சரியாகவே பொருந்துகிறது அல்லவா?

அவருடைய 35 வருடங்களுக்கு மேலான உழைப்பின் விளைவு:

- 100 க்கும் மேற்பட்ட யானைகள் வலசை வரும் இடம். 

- காசிராங்கோ வனவிலங்கு சரணாலயத்தில் இருந்து வெள்ளத்தில் வெளியேறிய 3 காண்டாமிருகங்கள் வாழும் இடம்.

- கார்பி அங்கிலோங் பகுதியில் இருந்து துப்பாக்கி முனையில் இருந்து தப்பியோடி வந்த 5 வங்க புலிகளின் சரணாலயம். 

- தேக்கு, ஆலமரம், மூங்கில், புளியமரம், மாமரம், பலாமரம் போன்ற பலவித தாவர வகைகளின் சரணாலயம் 

- பல கழுகுகள், வல்லூறுகள், பெலிக்கன்கள், நாரைகள், வாத்துக்கள்  வாழும் இடம்.

- கௌர் வகை மான்கள், கிப்பன் வகை குரங்குகள், முயல்கள் போன்ற பல விலங்குகளின் வாழிடம்.

- முக்கியமாக பல வகை பாம்புகள் வரத்தொடங்கின . அவை அங்கும் இங்கும் நெளிந்து வாழ்ந்து வருகின்றன. அவற்றை முதலில் பார்த்தவர் மகிழ்ச்சியில் ஆனந்த கண்ணீர் வடித்தார். 

- கொம்புகளுக்காக காண்டாமிருகத்தினை கொல்ல  வந்தவர்களை வனத்துறைக்கு தகவல் தெரிவித்து தவறு நிகழாமல் தடுத்தார். 

- அந்த வனம் ஜாதவின் செல்ல பெயரான 'முலாய் (molai)' என்ற பெயரிலேயே 'முலாய் காடு' என்று அழைக்கப்படுகிறது. 

தன்னுடைய வாழ்வாதாரத்திற்காக மாடுகள் வளர்த்து அதன் மூலம் கிடைக்கும் பாலினை விற்று குடும்பத்தினை கவனித்து கொள்கிறார்.

2012 இல் ஜவஹர்லால் பல்கலைக்கழகம் இவருக்கு 'Forest Man of India' என்ற பட்டம் வழங்கியது.

மறைந்த முன்னாள் இந்திய ஜனாதிபதி மதிப்பிற்குரிய அப்துல் கலாம் அய்யா அவர்கள் இவரை பாராட்டி பணமுடிப்பு வழங்கியுள்ளார். 

இந்திய அரசு 2015 ஆம் ஆண்டு இவருக்கு 'பத்ம ஸ்ரீ' பட்டம் வழங்கி கௌரவித்தது.

சரி! இவர் நம்மிடம் ஏதேனும் கேட்டு கொள்வது என்ன?

'நமது கல்வி முறையில் ஒவ்வொரு மாணவரும் இரண்டு மரங்களை நட வைக்க வேண்டும்' என்பதுதான்.

ஒரு தனிமனிதனால் 1360 ஏக்கர் அடர் வனத்தை உருவாக்கப்படும் போது நம்மாலும்  இயன்ற இடத்தில் பல்லுயிர் பெருக்கத்தை உருவாக்க இயலும் அல்லது பாதுகாக்கவாவது இயலும் என்பதில் மாற்றமில்லை. குறைந்தது உணவு சங்கிலியாவது அறுபடாமல் பார்த்துக்கொள்வது. இந்த உலக பல்லுயிர் பெருக்க நாளில் ஜாதவ்வின் வாழ்விலிருந்து குறைந்தது நல்மாற்றங்கள் வருவது   ஒரு விதையில்/செடியில் இருந்துதான் ஆரம்பமாகிறது என்பதையாவது உணர்ந்து செயல் படுவது புவிக்கும், நமக்கும்   நன்மை  பயக்கும் என்று நம்புகிறேன். 

நன்றி!

2070 இல் எழுதப்பட்ட ஒரு கடிதம்:

2070 இல் எழுதப்பட்ட ஒரு கடிதம்:

சென்னையில் கடந்த வாரம் ஒருநாள் இரவு சுமார் 9.30 மணியளவில் கடைத்தெருவிற்கு சென்று வந்தேன். ஒரு 300 மீட்டர் தூரம் தான் சென்று வந்திருப்பேன். தொப்பலாக நனைந்திருந்தேன். மழையால் அல்ல...
வியர்வையால்....
அப்படியெனில் ...
உயர் இரத்த அழுத்தமா? இல்லை
வேகமாக நடந்தேனா? அல்லது ஓடி வந்தேனா? இல்லை இல்லை
பிறகு....???
அதிக வெப்பம்!!! உணரப்பட்டது.

இப்போதும் நான் எழுதிக்கொண்டிருக்கும் இந்நேரத்திற்கு (இரவு மணி 1.30) முன்பு சுமார் ஒரு மணி நேரம் தான் மின் இணைப்பு துண்டிக்கப்பட்டது.

வெப்பத்தின் தாக்குதலில் தூங்கமுடியவில்லை. நானும் எனது மனைவியும் எனது மகளுக்கு விசிறிக்கொண்டிருக்கிறோம்.
என்னுடைய 21 மாதமே ஆன எனது மகள் எழுந்து வந்து எங்கேயாவது இயற்கையாக காற்று கிடைக்குமா என்று வீட்டில் எல்லா அறைக்கும் சென்று நடந்து பார்க்கிறாள். அவளுக்கு சொல்ல தெரியவில்லை சிணுங்குகிறாள் (whining). தண்ணீர் அருந்துகிறாள். மறுபடியும் நடக்கிறாள். தண்ணீர் அருந்துகிறாள். மறுபடியும் சிணுங்குகிறாள். அந்த காட்சியினை பார்க்கையில் கலைஞர் மு. கருணாநிதி அவர்கள் தன் சிறையில் வாடும் தன் மகளை பார்த்துவிட்டு வந்து சிறையின் வெப்ப கொடுமையினை விளக்குவது ஞாபகத்திற்கு வந்து சென்றது. அதாவது, 'அந்த சிறையின் சூழல் எப்படி இருக்குமென்றால் ஒரு பூவினை கொண்டு வைத்தால் அது உடனே கருகிவிடும்' என்பதுதான்.
குழந்தையின்சி ணுங்கல் அதிகபட்ச அழுகையாக மாறிவிடக்கூடாது என்பதற்காக தூக்கிக்கொண்டு தெருவிற்கு வந்தால் அங்கே தூங்க முடியாமல் பலரும் நின்று கொண்டும் பேசி கொண்டும் இருந்தனர். மின்வாரிய அலுவலகத்திற்கு தொடர்பு கொண்டால் அழைப்பு சென்ற அடுத்த வினாடியே தொடர்பு முடிவடைகிறது. வாடிக்கையாளர் சேவை மையத்திற்கு தொடர்பு கொண்டால் தொடர்ந்து busy யாகவே இருக்கிறது.

புவி வெப்பமயமாதலில் நமக்கு இப்படியெல்லாம் பாதிப்பு ஏற்படுமோ என்று நினைக்கையில் 10 வருடத்திற்கு முன்னர் பார்த்த ஒரு powerpoint presentation .pps வடிவில் பார்த்தது ஞாபகம் வந்தது. அது 2070 இல் எழுதப்பட்ட ஒரு கடிதம் போன்று அமைக்கப்பட்டிருந்தது. அது ஏப்ரல் 2002 இல் Cronicas de los Tiempos என்ற ஸ்பானிஷ் பத்திரிகையில் வெளிவந்ததாக தகவல் தெரிவிக்கிறது. அது நீரின் அருமையினை விளக்கும் ஒரு விழிப்புணர்வு பரப்புரை.
அதின் முக்கிய சாராம்சம்:
2070 இல் 50 வயதில் வாழும் ஒரு நபர் 85 வயதினை ஒத்த தோற்றமுடையவராக இருக்கிறார். அவரே அதிக பட்ச வயதினை உடையவராகவும் இருக்கிறார்.
நீர் பற்றாக்குறையால் நாம் என்னென்ன நோய் தாக்கத்தை பெற முடியுமோ அதெல்லாம் பெற்றிருந்தார். அதாவது. சிறுநீரக பிரச்சினைகள்
தன்னுடைய இளமை காலத்தில் தோட்டங்கள், பூங்காக்கள் அரைமணி நேரமாக குளிக்கும் காட்சியெல்லாம் போன்றவற்றை நினைத்து பார்க்கிறார். அவர் தற்போது வாழும் காலத்தில் (2070) அவருடைய உடலினை கழுவுவதற்கு mineral oil மற்றும் துண்டு வழங்கப்படுகிறது.
முன்பு பெண்கள் அழகான கேசத்துடன் இருந்தனர், ஆனால் தற்போது தண்ணீர் இல்லாததால் சுத்தமாக இருப்பதற்காக தலையினை சுத்தமாக மழித்து கொள்ளவேண்டும்.
தன்னுடைய இளமை காலத்தில் 'தொலைக்காட்சிகளிலும், வானொலியிலும், சுவரொட்டிகளில் போன்றவற்றிலும் வலியுறுத்தப்பட்ட 'நீரை சேமிப்போம்' என்ற வார்த்தையினை யாரும் கண்டுகொள்ளாதிருந்ததை நினைவு கொள்கிறார்.
தற்போது அனைத்து ஆறுகள், ஏரிகள், குளங்கள், அணைகள் அனைத்தும் வறண்டோ அல்லது மாசுபட்டோ இருக்கிறது.
தொழிற்சாலைகளில் தொழிலாளர்கள் தங்களுடைய சம்பளத்தின் ஒரு பகுதியாக நீரை வாங்கி செல்கின்றனர்.
80 சதவீத உணவுகள் செயற்கையானவையாக இருக்கின்றது.
தண்ணீருக்காக கொள்ளை சம்பவங்கள் ஆங்காங்கே நடந்தேறுகின்றன.
ஒருவருக்கு ஒரு நாளைக்கு அரை தம்பளர் தண்ணீரே குடிப்பதற்கு அனுமதிக்கப்படுகிறது.
மக்கள் தண்ணீர் இல்லாததால் கசிவு நீர் தொட்டியினையும் (Septic Tank ) பயன்படுத்த ஆரம்பிக்கின்றனர்.
ஆராய்ச்சியாளர்கள் எவ்வளவோ ஆராய்ச்சிகள் செய்தும் முடிவுகள் கிடைக்கவில்லை
தண்ணீர் தங்கம், வைரத்தினை விட மிக மதிப்பு மிகுந்த பொக்கிஷமாக கருதப்படுகிறது. உலகில் எங்கேனும் சுத்தமான நீர் நிலைகள் காணப்பட்டால் அங்கே ஆயுத பாதுகாப்புடன் படை வீரர்கள் நிறுத்தப்பட்டுள்ளனர்.
குழந்தை கேட்கிறது 'இப்போது ஏன் தண்ணீர் இல்லை'?
இவ்வாறு நாம் இப்போது வீணடிக்கும், குறைத்து கொண்டிருக்கும் தண்ணீரின் நிலையினை, தண்ணீரில்லாத நிலையினை மிக அழகாக விளக்கியிருக்கிறது இந்த powerpoint presentation இதனை தயாரித்தவர் மறைந்த மதிப்பிற்குரிய முன்னாள் ஜனாதிபதி அய்யா அப்துல் கலாம் என்று நிறைவடைகிறது. ஆனால் இது Ria Ellwanger என்பவர் Lopez Chavez Ariel
என்பவரும் இணைந்து உருவாக்கியதாக ஒரு வலைப்பதிவு குறிப்பிடுகிறது.
http://philosophyrecycled.blogspot.in/…/letter-written-in-y…

எது எப்படி இருப்பினும் நீரின் அருமையினை உணர்த்திய இந்த powerpoint presentation ஐ உருவாக்கியவர்களுக்கு மனமார்ந்த பாராட்டுக்களை உரித்தாக்குகிறேன்.

இதனை காணொலியாக பார்ப்பதற்கு கீழேயுள்ள சுட்டியினை சொடுக்குக:
https://www.youtube.com/watch?v=0ReVrONNvoQ

இப்போதே நாம் நம்முடைய பல ஆறுகளையும், ஏரிகளையும், குளங்கள், குட்டைகள் என அனைத்து நீர் நிலைகளையும் கொன்று கொண்டு இருக்கிறோம். இவைகள் மீட்டெடுக்க வேண்டிய கட்டாயத்தில் இருக்கின்றோம். இதற்கு ஆதாரமாக உள்ள மழை பொழிய வேண்டும். அதற்கு அதிக அளவில் மரக்கன்றுகள் நடுவதும் நமக்கு அவசியமாக இருக்கிறது.

சுருக்கமாக சொல்லவேண்டும் என்றால்:
மரக்கன்று நடல்
நீர் சேமிப்பு
நீர்நிலைகள் மீட்டெடுப்பு
ஏனெனில் 'நீரின்றி அமையாது உலகு'
இந்த நேரத்தில் நான் பதிவிட்டு உங்கள் தூக்கத்தினை கெடுத்திருந்தால் மன்னிக்கவும், ஏனெனில் அகக்கண் முழிக்க வேண்டிய தருணமிது. நன்றி!

போச்சியா (Boccia) என்றொரு விளையாட்டு

இந்த விளையாட்டு முதலில் மூளை முடக்குவாதத்துடன் (Cerebral Palsy) வாழ்பவர்களுக்காக துவங்கப்பட்டது. பிறகு இடுப்பிற்கு கீழ் தீவிரமாக பாதிப்படைந்த (உ-ம் - தண்டுவட பாதிப்பினால் இடுப்பிற்கு கீழே செயல்பட இயலாதவர்கள்) மாற்றுத்திறனாளிகளுக்கு விளையாட அனுமதிக்கப்பட்டனர். சுருக்கமாக சொன்னால் தவழும் மாற்றுத்திறனாளிகள் என கொள்ளலாம்.
இந்த வகை விளையாட்டு இந்தியாவிற்கு அறிமுகமானது 2014இல் தான். YWTC (Yes We Too Can) Charitable Trust (Chennai) மற்றும் Choice International (UK) நிறுவனங்கள் இணைந்து கூட்டாக சென்னையில் பயிற்சி நடத்தினர். அதிர்ஷ்டவசமாக முதல் பயிற்சி முகாமில் எமது நிறுவனத்தில் இருந்து மாற்றுத்திறனாளிகளை அனுப்பி வைத்ததால் மாதிரிக்காக நானும் விளையாண்டு பார்க்கும் வாய்ப்பு கிட்டியது.
Choice International நிறுவனத்தின் முதன்மை செயல் அதிகாரி பயிற்சியினை வழங்கினார். அவரே ஏக்தா என்ற அமைப்பிற்கும் இப்பயிற்சியினை வழங்கி இந்த விளையாட்டினை மேம்படுத்த வழிவகுத்துள்ளார். ஏக்தா அமைப்பினை சேர்ந்த திரு. ராஜீவ் மற்றும் அவரது குழுவினர் இந்த மேம்பாட்டு பணிகளை செய்து வருகின்றனர். எமது நிறுவனம் சார்பாக தற்போது முதல் கட்டமாக 4 மாவட்டங்கள் தேர்வு செய்யப்பட்டு பயிற்சிகள் வழங்கப்படுகிறது. முதல் பயிற்சி 6.5.17 அன்று வேலூரில் நடைபெற்றது. இதன் தொடர்ச்சியாக இன்று விழுப்புரத்திலும் நாளை கடலூர் மாவட்டத்திலும் அதனை தொடர்ந்து காஞ்சிபுரம் மாவட்டத்திலும் நடைபெற உள்ளது.

இந்த விளையாட்டு சர்வதேச அளவில் அங்கீகாரம் பெற்ற விளையாட்டாகும். பாரா ஒலிம்பிக்கிலும் இந்த போட்டிகள் உள்ளது. தங்க மாரியப்பனின் வெற்றிக்கு பிறகுதான் பாரா ஒலிம்பிக்கே இந்தியாவில் பார்க்க துவங்கியுள்ளது. இந்த நிலையில் அடுத்த பார ஒலிம்பிக்கிற்கு ஏற்கனவே உள்ள விளையாட்டுகளுடன் சக்கர நாற்காலி கூடைப்பந்தாட்டம் களமிறங்க தயாராக உள்ளது. அடுத்தபடியாக போச்சியா விளையாட்டினையும் களமிறக்க ஆயத்தமாகி வருகின்றனர் ஏக்தா அணியினர். தொடரட்டும் அவர்கள் சேவை, புகழ் பெறட்டும் இந்திய அணியின் பெயர்.
உங்கள் மாவட்டத்திலும் இந்த பயிற்சி தேவைப்படுகிறது எனில் ஏக்தா அமைப்பினை தொடர்பு கொள்ளலாம்.
திரு. ராஜுவ் ~9840630268
திரு. சதீஷ் ~9710903660

நன்றி!

ஆரோன் ~ 9952467424

சீகன்பால்க் (Bartholomäus Ziegenbalg)

ஜெர்மனியில் பிறந்து தமிழ்நாட்டில் ஆன்மிக பணிக்காக வந்து இந்தியாவிலேயே முதல் அச்சகத்தை நிறுவி, முதல் தமிழ் அகராதியினை அச்சிட்டு, பள்ளி குழந்தைகளுக்கான முதல் அச்சு வடிவிலான பாடநூலினை வழங்கி, பெண்களுக்கான முதல் தையல் கூடம் ஆரம்பித்து, இந்தியாவில் முதல் காகித ஆலையை நிறுவி, தமிழ் நாட்காட்டியினை முதல் முதலில் அச்சு வடிவில் வழங்கி, இலவச மதிய உணவு திட்டத்தினை வழங்கி, தமிழ் நூல்களை ஜெர்மன் மொழியிலும் வெளியிட்டு தமிழ்நாட்டிற்கு பெருமை சேர்த்த பார்த்தலோமேயு சீகன்பால்க் (Bartholomäus Ziegenbalg) அவர்களது திருவுருவ சிலையினை தரங்கம்பாடி சென்ற போது பார்க்க வாய்ப்பு கிட்டியது. அவருடைய செயல்களை, அவர் எவ்வளவு விஷயங்களில் முதலிடத்தில் இருக்கிறார் என்று நீங்களும் புகைப்படத்தினை கண்டு மகிழுங்கள்.
நன்றி!

தரங்கம்பாடியில் தோப்பு குழுவினர் செயல்பாடுகள்

நாள்: 06.05.2017

இடம்: குடும்பம், சமுதாய பல்நோக்கு மையம், சாத்தங்குடி, தரங்கம்பாடி, நாகப்பட்டினம் மாவட்டம்.

நிகழ்வில் கலந்து கொண்வடு சிறப்பித்தவர்கள்:

திரு.முத்துகிருஷ்ணன்-காரைக்கால்

திரு.கலைமணி மற்றும் குடும்பத்தினர், திருவாரூர்

திரு.ஆரோன்-சென்னை

திரு.மதி-அரியலூர்

திரு.அன்பு _திருவிளையாட்டம்

திருமதி.கெஜலட்சுமி மற்றும் குடும்பத்தினர் மன்னார்குடி

திரு. நடராஜன் அவர்களின் குடும்பத்தினர் ,உறவினர்கள் மற்றும் சுற்று வட்டார மாணவ மாணவிகள்

மற்றும்

தரங்கை நண்பர்கள்

பயிற்சி ஒருங்கிணைப்பாளர்: திரு. பொன். நடராஜன்

முன்னுரை:

இயற்கை வளங்களை பாதுகாத்தல், பராமரித்தல் மற்றும் வளப்படுத்தல் என்ற நோக்கோடு தோப்பு என்ற வாட்ஸாப்ப் குழு உருவாக்கப்பட்டது. இதில் இயற்கை வளங்கள் மேம்பாடு குறித்த சிந்தனை அடிப்படையாக கொண்டு ஆர்வலர்களை ஒருங்கிணைக்கும் பணியில் குழுவில் இணைத்து. இதில் விதை பந்து தயாரித்தலை தெரிந்து கொள்ளவும், மரக்கன்றுகள் உற்பத்தி செய்யும் முறையினை கற்பிக்கவும், நீர் சேமிப்பு, மறுசுழற்சி, ஆர்வலர்களை ஒருங்கிணைக்கவும் குடும்பம், சமுதாய பல்நோக்கு மையம், சாத்தங்குடி, தரங்கம்பாடி, நாகப்பட்டினம் மாவட்டத்தில் பயிற்சி ஏற்பாடு செய்யப்பட்டது.

முக்கிய நிகழ்வுகள்:

பங்கேற்பாளர்களுக்கு விதை பந்து தயாரித்தல், மரக்கன்று நாற்றங்கால் அமைத்தல்,வீடு தோட்டம் அமைத்தல், தண்ணீர் சிக்கனம் மற்றும் மறுசுழற்சி, மாடி தோட்டம் அமைத்தல், நெகிழி பயன்பாடு தவிர்த்தல் ஆகியன குறித்து பயிற்சிகள் வழங்கப்பட்டன.

பயிற்சிகளை தோழர். கலைமணி, தோழர். நடராஜ் மற்றும் ஆரோன் ஆகியோர் வழங்கினர்.

தோழர். கலைமணி விதை பந்து மற்றும் மரக்கன்றுகள் உற்பத்தி செய்தல் போன்றவை குறித்து செய்முறை விளக்கம் அளித்தார். பங்கேற்பாளர்கள் அனைவரும் விதை பந்துகள் தயாரித்தனர்.

ஓசோன் காற்று அதிகம் வீசக்கூடிய கடற்கரையினையும் பங்கேற்பாளர்கள் கண்டுகளித்தனர். காலம் கடந்தால் தரங்கம்பாடி கோட்டையினை கண்டு களிக்க இயலவில்லை.

மரக்கன்றுகளை பராமரிக்கும்ஆ ர்வமுள்ள குழந்தைகளுக்கு தோழர். கலைமணி அவர்கள் எடுத்து வந்திருந்த யானைகுண்டுமணி, புங்கன், வேம்பு போன்ற 12 வகை மரக்கன்றுகள் வழங்கினார். வளாகத்திலும் ஒரு மரக்கன்று நடப்பட்டது.

மாணவ மாணவிகள் ஆர்வமுடன் விதை பந்துகளை உருட்டுவதிலும், கேள்விகள் கேட்பதிலும், பங்கேற்பிலும், உணவு இடைவேளைக்கு பிறகு புத்துணர்வு ஊட்டுவதற்காக அவர்களே விளையாட்டுகளை நடத்தியது என்று அனைத்தும் கண்கொள்ளா காட்சியாக இருந்தது.

திரு. முத்துகிருஷ்ணன் அவர்கள் 'நமது உலகம் இயற்கை விவசாய நடுவம்' சார்பாக நடத்தப்படும் வாழ்வியல் முகாமிற்கு அழைப்பு விடுத்தார்.

இறுதியில் கலந்து கொண்ட அனைவருக்கும் பாராட்டு சான்றிதழ்கள் வழங்கப்பட்டன.

முக்கிய கலந்தாய்வுகள்:

- தோப்பு குழு அமைப்பாக செயல்பட விரைந்து நடவடிக்கை எடுக்க முடிவுசெய்யப்பட்டது.

- ஆர்வமுள்ளவர்களையும் தகுதியானவர்களையும் அடையாளம் கண்டு பணிகளை செய்வதென்று கலந்தாலோசிக்கப்பட்டது.

- புவி வெப்பமயமாதலை அடிப்படையாக கொண்டு புவி வெப்பம் குறைப்பதற்கான நடவடிக்கைகள் மேற்கொள்ள வேண்டும் என்று ஆலோசிக்கப்பட்டது.

- ஓராண்டு திட்டம் கொண்டு செயல்பாடுகள் அமைக்கப்பட வேண்டும் என்று திட்டமிடப்பட்டுள்ளது.

- மே 22 - பல்லுயிர் பெருக்க நாள் மற்றும் ஜூன் 5 - சுற்று சூழல் நாள் ஆகிய இரண்டு நாட்களுக்கு விழிப்புணர்வு மற்றும் செயல்பாடுகள் திட்டமிடல்

- தோப்பு குழுவிற்கு நேரிடையாக செயற்களத்தில் இயங்குபவர்கள், நிகழ்ச்சி ஏற்பாட்டாளர்கள் மற்றும் புரவலர்கள் அனைவரையும் இணைத்து செல்லுதல்.

- ஒவ்வொரு செயல்பாட்டிலும் விரிவான கண்ணோட்டத்தில் செயல்படுதல்

- சுற்றுசூழல் பாதுகாப்பு, இயற்கை விவசாயம், சூழல் பாதுகாப்பு தொடர்பான செயல்பாடுகளை மாவட்டந்தோறும் முழு ஆர்வத்துடன் பங்கேற்கவும், செயல்படவும், ஆதரவளிக்கவும், வழிகாட்டவும், பொருளுதவி செய்யவும் வாய்ப்புள்ள நபர்களையும் அவர்களின் விபரங்களையும் கண்டறிதல்.

- உள்ளூர் அமைப்புகளை கொண்டுமழைநீர் சேகரிப்பு வாய்ப்புகள், நிலத்தடி நீர்மட்டம் உயர்த்துதல் தொடர்பாக கிணறு, குட்டை, குளம், ஏரி போன்றவற்றை தூர்வாருவதற்கு நடவடிக்கை எடுப்பது.

- ஒவ்வொரு பொருட்கள் உற்பத்தியிலும் நீர் பயன்பாடு-மறைநீர் குறித்த விழிப்புணர்வு அளிப்பது.

- அமைப்பினை வலுவாக்கி செயல்படுத்த முன்னின்று செயல்படக்கூடியவர்களை வைத்து திட்டமிடல் கூட்டம் நடத்துதல்

முடிவுரை:

இந்த செயல்பாட்டில் குழந்தைகளை ஈடுபடுத்தியது மகிழ்ச்சியான அனுபவம். வரும் நிகழ்வுகளில் குழந்தைகளுடன் இளைஞர்களை இணைத்தல், அமைப்பினை உருவாக்குவதற்கான சாத்தியக்கூறுகள், அடுத்தகட்ட பணிகள், மக்கள் ஈடுபாடு ஆகியவற்றை முன்னிறுத்திய செயல்பாடுகள் திட்டமிடுவதனை தோப்பு எதிர்பார்த்து நிற்கின்றது.

நன்றி!

அறிக்கை தயாரிப்பு:

க. இ. ஆரோன் ஜோஷ்வா ரூஸ்வெல்ட்